【笑到最後】食老本的盡頭（高明）
蘋果日報 2020/06/28 14:52
高明股息稅笑到最後食老本
高明指，銀行股因監管而唔派或息派息，食老本的難度又高了。
美國疫情反彈，美股上周五跌730點。由於今年武漢肺炎剛開始嘅時候，單日閒閒地跌過千點，最大跌幅曾為2,997點，所以跌730點已經唔會出現fb洗版。
同一道理，既然千升千跌已經慣咗，武漢肺炎第二波即使不幸死更多人，亦不會重演二、三月的大跌，因為已經發生過一次，再發生嘅恐懼已大不如前。情況有如如果今日再嚟一次金融海嘯，大家知聯儲局會瘋狂印鈔，所以跌幅唔會同上次一樣咁多。新一次跌浪，必須要比上一次更衝擊大家想像，先可以跌更加多。
美股下跌原因，係聯儲局資產負債表連續兩星期收縮至7.08萬億美元。美股牛市，係企業發明咗低息借貸再回購股票，將美股同印鈔綑綁，武漢肺炎前都仲可以間中憧憬吓企業有新發明、業績好，依家肯定更依賴寬鬆貨幣政策，一停印錢升浪就要唞唞。翻睇過去緩慢縮表後馬上要再印錢嘅紀錄，全球已經走上不歸路，停只會係短暫，最終必定會不停印鈔。
撇除美中政治因素，高明認為，比較緊要嘅新聞，就係聯儲局公佈限制大銀行派息及禁止回購至第三季，同滙控（005）被英倫銀行禁止派息一樣，依家伸延至美國，所謂暫時措施，其實2008推出QE時一樣係話非常時期非常手段，結果非常咗超過十年。
未來一般人最大危機，就係收益率收縮。過去買一嚿資產返嚟，預期佢會派息，幫你供按揭或每期有一定收入，拉長計資產價格上升，有財息兼收一說。
銀行股因監管而唔派或息派息，剩低落嚟嘅股票會有幾種情況：一、有能力派息，股價被搶到貴一貴，由收息股變升增長股；二、自行減派息；三、股價大跌，歷史派息率高，屬價值陷阱。
即係話，食老本嘅難度又高咗，要取得收入，一係工作，一係博股價上升。而央行直接指令銀行減派息嘅啟示係，政府亦都留意到，打股息嘅主意，反對聲音最少，特別係全球政府（中國除外）都派錢，未來肯定有財政危機。
好多外國政府已收緊股息稅，加上過去嘅爭議冇新立法咁大，至於香港如果出現財赤要納股息稅會點？問題應該係：你有得反對咩？
高明
https://www.facebook.com/bigricetea/
-----------------------------
-----------------------------
-----------------------------