意科大戶收貨冇手軟
據說由於隻股太搶手，喺星期五嗰日收盤時，已經唔夠貨，今次有份「入飛」嘅大戶話隻股應該要升到4毫子樓上先叫做合理，以配股價3毫子計，即係話有三成幾升幅，都咪話唔和味。
之前公布過同IBM合作研製中文處理器嘅文化傳訊（343），終於喺上星期五宣布推出中文處理器，據說佢哋已經收到唔少定單。不過隻股上星期五已經升咗7個巴仙，升得咁急可能要唞一唞氣先會再衝過，大家不妨留意吓，喺低位買番啲。
另一隻之前走勢幾好嘅意科（943），較早時有個大戶出貨，曾經一度跌番落去2毫半水平，不過由於其他大戶仍然唔肯離場，而且收貨一啲都冇手軟，上個禮拜五已經高收番喺0.275元。
聽行家話，意科公布同深業物流合作後，合營公司已經搵到首個海外大客，聽講重係好有名氣，𠵱家只係爭個客擇日簽約。如果俾佢哋做到呢單生意，淨係收錢都收到手軟。
伏勝