啱啱秋涼,又到咗搞保釣大騷嘅時候嘞。今年輪到飛天朱,好似上咗身咁,自從摟住塊五星旗賀十一飛降完沙灘,又走去釣魚台,點知遭到日本政府出動十艘炮艇、多架直升機,將飛天朱哋擊退,保釣團體連隻船都撞崩埋,搞到落荒潰逃,敗走廈門。㗎仔護島,再次大獲全勝。
飛天朱想空降
釣魚台明明係中國領土,但點解會搞成咁?記得阿松教導過香港人;銀紙搵幾多,都唔係自己嘅,搵咗而識使,啲錢先至真正屬於自己嘅。
釣魚台嘅主權,亦係一樣。中國聲稱擁有主權,不過得個講字,釣魚台摸唔到,上唔到去,自己就蜑家雞見水,人哋日本仔船堅炮利,可以守護,可以登陸,亦隨時喺釣魚台起燈塔、唱K。
即係好似媾女咁。條女已經俾第條仔攬到實一實,鍾意就錫一啖,鍾意又摸兩嘢,人哋日頭糖黐豆咁出街,夜晚同居一齊瞓。你就孤家寡人,條女啲相,就貼滿成牆,但你就通街亂咁嗌,話個女仔係你個老婆仔喎?大廈看更同街坊,係咪應該報警,將你閣下送入青山呢?