嫻姐噚日出席無綫節目《講清講楚》，就講到自己家住半山係好唔情願，只係當初住嘅灣仔永豐街收樓，重建成太古廣場三期，發展商賠嗰700萬，又買唔起附近嘅豪宅匯星壹號，結果搵咗成年樓都冇着落，只好聽佢家姐建議，一齊「迫遷」上價錢「最平」嘅半山堅尼地道。佢仲呻話以前七、八分鐘落到港鐵站，家行多百幾級樓梯，都咪話唔辛苦喎。早排反日保釣活動熱烘烘，工聯會麥美娟話要向日本呢個「唔公義、唔安全」嘅國家，發黑色旅遊警示，當正喺大阪行山嘅嫻姐冇到，其心可誅。嫻姐話自己當時喺長野縣深山聽到消息，都忍唔住講句「吓，好玩喎」，噚日對住鏡頭，除咗承認默契唔夠，都唔知有乜好講。另一位工聯會立會新丁都好，勞工界郭偉強噚日應邀出席精神健康月活動，所有官員着晒黑、白色衫，為十．一海難死者哀悼，惟獨佢一個着粉紅衫，最後搞到影相都要匿埋後排廢事獻醜。