【Second Life】Monzo蝕足5年 網民倡撳錢走人(杜夫人)
英國虛擬銀行Monzo開業5年仍未扭虧,情況令用家擔心,有網民更話要轉走戶口嘅錢,若客戶因信心動搖而集體走人,虛銀就前功盡廢兼翻盤無望。
截至今年2月底止的全年業績,Monzo用戶一年間增加230萬人至大約400萬人,淨利息收入2,442萬元(英鎊・下同),按年升3.96倍,主要係期內推出咗貸款業務;非利息收入2,940萬元,按年增加3.47倍,帶動總營運收入大升2.89倍至3,565.8萬元,但始終未能收支平衡,期內總支出按年增1.52倍,至1.51億元,加上預期信貸損失增至大約2,000萬元,導致稅後虧損1.13億元。
開業5年,仍未扭虧,低息環境下,撞正百年一遇新冠肺炎疫情,進一步影響上客量及客戶消費意欲,今年收入勢必更差,管理層當務之急係開拓收入,同時,要關注網民「情緒」,如果引發大規模「撳錢走人」行為,就真係雪上加霜。
Revolut都面對同樣困局,付費客戶、活躍用戶倍數上升,快速擴張澳洲、新加坡及美國市場,兼大幅投資情況下,去年仍未止血,要蝕超過1.06億元。香港虛銀今年初陸續開業,講盈利是言之尚早。但,一直燒錢都唔係辦法,唔通真係有一瓣生意只講求賺客戶體驗?
講到用戶體驗,新開業的Livi無卡無loan無定期產品,成個手機應用程式(app)唯一重點係支付,推出夥拍銀聯QR code支付方案,再shake回贈下次消費用,回贈比率無公開提及,係咪吸引就睇用家手氣啦!
不過,銀行將發展重心放喺支付,更似一個輔助性質的「錢包」,現時港人常用「錢包」已經有好幾個,如PayMe、支付寶香港、WeChat Pay HK,想喺呢個爭崩頭嘅市場上分一杯羹,真係勇氣可嘉。
Livi管理層話希望開拓多啲場景,提升app使用量某程度講,就係多啲活躍用戶。不過,活躍用戶多,又唔一定等於用戶會將app當成係「主要銀行」,將大部份資金一併存入,睇Monzo情況就知。對經營持續性嚟講,活躍用戶重要,抑或吸到活期、低成本資金緊要?
題外話。杜夫人記性差,開戶半日就忘記密碼,發現更改密碼有六步曲,一是自拍,二是輸入身份證6位數,三是輸入電郵,四是輸入出生日期,五是收到手機短訊一次性密碼,六是更改密碼,最後會收到確認短訊。
略嫌第二和第四步重複咗,整個過程幾分鐘搞掂,換個角度睇,畀人白撞機會大減。多一個小意見,如果輸入密碼時,有隻眼仔button可以畀用戶睇住嚟入就更清楚。
-----------------------------
-----------------------------