李克勤、王灝兒（JW）同Dear Jane今日去到旺角麥花臣場館參與「太陽計劃2017—同行抗毒 強者本色」活動，克勤細仔最近愛上打籃球，所以佢襯到旺角，順便幫囝囝買小童籃球，佢話：「暑假小朋友多啲戶外活動好啲，好過打機，打機同毒品一樣，o依家限佢哋每日玩半小時，不過永遠都唔聽。」兩個仔都有自己電話，又會擺相上網，克勤唯有叮囑兩個仔唔好放有自己樣嘅相，兼且不時監察住佢哋網上帳戶。

克勤個紅館演唱會加開多一場至共7場，佢坦言自從95年賣飛賣得唔好，每次開騷前對票房都感到好有壓力，尤其同人合作開騷時更擔心會拖累到別人。克勤又提到日前同太太跟李嘉欣補祝生日，佢話久不久會聚會，而嘉欣乜都有，唔需要送禮物。

另外，JW看似發福不少，佢解釋係件衫太細，平時都會同男友及朋友一齊做gym，又會同男友食健康餐。下月將推出新碟，佢唔敢諗能否做出比《矛盾一生》更好成績，不過已計劃好稍後同吳業坤開免費迷你音樂會，明年再攪個人演唱會。