黃建東(Derek)最鍾意扮鬼扮馬，早前憑惡搞日本洗腦歌《PPAP》成功上位，早前佢見龍哥rap住作法咁hit，自己又與製作隊半夜三更上飛鵝山拍咗條「龍哥打邊爐」嘅片放上網，點知有網友係其中一個畫面見到疑到鬼影，隱約見到有鼻同口，嚇到Derek即刻留言﹕「Omg！Are U serous？」但亦有網友覺得只係樹枝陰影。

Derek今日接受傳媒電話訪問時，都話驚到唔敢夜晚睇片，佢話﹕「我拍嗰陣都踏入咗農曆七月，網友話有嘢，我咁細膽，都真係有啲驚，夜晚喺屋企唔敢開條片嚟睇，怕污穢嘢走出嚟。」問到當晚有冇咩奇怪嘢發生？佢話﹕「因為呢排要開劇，上到飛鵝山都凌晨12點幾，行一條山路嘅樓梯時，係feel到有啲唔舒服，但自己又唔敢周圍望，怕望到啲唔想望嘅嘢影響拍攝。其實平時tvb拍劇，會有劇務攞住一紮香，拍前會點香拜一拜，但自己拍片又醒唔起，後來見好多留言都話涼亭好多....以後都唔敢夜媽媽去荒山野嶺拍嘢。」

P.S.信不信由你