距離下屆特首戰仲有成3年，但對於選舉嚟講，一啲都唔長，好似被認定有機會角逐連任嘅特首林鄭月娥咁，已經儲定子彈喺庫房，玩財技避赤字預算，以便隨時派糖爭民心；雖然有指林鄭局部收回粉嶺高球場辣㷫唔少大孖沙，但都有啲富商續撐林鄭，其中信置集團主席黃志祥一馬當先，力撐林鄭收回高球場，仲四度稱「當然支持、一定支持」林鄭連任，豎起姆指話「佢係最好㗎！」

身兼港區政協委員嘅黃志祥，星期日喺北京被問到政府收回粉嶺高球場建屋問題時，搶閘表態，先係話支持政府接受土地供應小組嘅建議，認為係應該做嘅事；至於有意見指收回高球場會影響香港國際聲譽，佢就不以為然，話香港係自由市場，人人都有自己嘅意見，深信未來供應穩定，總之信置會繼續投地，保持大好友本色。

其後有記者問佢支唔支持林鄭連任，黃志祥毫無掩飾盡情撐：「當然支持啦！（做埋下一屆喎？）當然支持！（點解嘅？）當然支持！（點解嘅？）一定係支持！」有記者再追問：「咁（林鄭）邊方面做得好呀？」黃志祥豎起姆指盛讚：「佢係最好㗎！」唔知係咪中共「文山會海」壓人，67歲嘅黃志祥被追訪時眼神有啲渙散，精神似乎麻麻。

信置向來係「娥粉」，對娥特既出錢又出力。林鄭當年選特首，信置太子黃永光係林鄭競選辦副主任，陪住佢四出拉票，當年兩父子亦向林鄭定額捐款10萬蚊。眾所周知，林鄭心繫故宮博物館，日前信置旗下黃廷方慈善基金就向北京故宮博物院捐款逾億元，出席捐款儀式嘅林鄭真係有face。

娥特率先獲大孖沙撐連任，有傳前特首梁振英亦舉動多多疑似準備重出江湖，尤其成日喺大灣區等國策議題同林鄭爭風頭；本身係梁班子治下行會成員嘅頭號「梁粉」、全國政協委員張志剛，周日被傳媒問到政府收回高球場時就話喎，大家要討論攞走32公頃後對高球場有咩影響囉，覺得所有問題都要平衡，要顧及高球運動，似乎都有啲暗批娥特。至於有傳梁振英復出，佢話唔回應揣測性問題，又話梁振英目前工作已經好忙，但冇代前老闆放話say no喎！

3月7日《動腦Q馬拉松》
一日玩11場 全日派22萬
12:30pm-10:30pm
Let's QQQQQQQQQQQ the money！
http://bit.ly/2ICO2Mb