林鄭周二終於就「送中條例」引發嘅爭議現身致歉，不過傳說中佢會以「身體語言」，即鞠躬道歉就冇影，至於「撤回」兩個字，更加係撬極都撬唔開佢把口，「撤銷6.12對示威者的控罪」亦當然冇提及。今次現身，黑面道歉，恐怕係再一次火上加油。

歷史告訴我們，道歉的確是一種藝術。

英國石油公司 墨西哥灣漏油案

2010年5月，英國石油公司（BP）位於墨西哥灣嘅深海鑽油台爆炸，造成11人死亡，幾百萬桶油流入墨西哥灣，造成極之嚴重生態災難。錯就要認，打就企定，不過時任BP CEO Tony Hayward喺事發後，竟然講咗一句，「It's "relatively tiny" compared to the "very big ocean."」咁都未夠，喺正式道歉時，又加多句：

「I'm sorry. We're sorry for the massive disruption it's caused their lives. There's no one who wants this over more than I do. I'd like my life back. 」

11條人命死咗，佢就只掛住佢有佢生活？結局，佢終於得償所願，同年5月，Tony Hayward宣佈辭職，正式Get his life back。

山一證券破產 道歉記招成「神會見」

道歉最緊要誠懇，的確，過往亦有企業，成功因為一場「道歉記招」而化腐朽為神奇。

1997年11月，曾被稱為「戰後四大證券」之一嘅山一證券宣布破產，當時社長野澤正平出席「道歉記招」時，痛哭流涕，態度極為誠懇，佢更講到，「 公司虧損全都是我不好，絕非社員過錯，所以懇請支持山一證券的社員們，拜託了！ 」有膊頭、有擔當、不諉過他人，當年路透社記者形容：「1997年中冇一個鏡頭，比呢個畫面更令人印象深刻。」記招此後被形容為「神會見（記招）」。（記招實況可睇呢條Link： https://youtu.be/gDBtZ9j28Gc）

結果，因為呢次記招，日本一面倒同情山一證券，市場超過4,200家公司，向已經破產執笠嘅山一證券請人，令原本面臨失業嘅員工有新飯碗。

「道歉要露出是常識吧」

林鄭第一次道歉，冇露面，衰過WhatsApp講分手；
林鄭第二次道歉，有露面、但黑面，誠意見唔到，見到嘅只係霸氣同唔忿氣，而聽到嘅係：「Sorry囉！」

呢幾日林鄭、克警一哥、醫管局、警監會，接二連三嘅記招，表演嘅係「割蓆割得快，卸膊好世界」。咁多個部門，除咗林鄭黑住面咁Sorly囉外，其他人，冇人道歉過。

呢個時候，我諗起一個人，前警務處一哥，人稱Sorry Sir嘅鄧竟成。佢在任時，呢位「一哥」背負住警隊嘅壓力，三度代表警隊致歉，印象中，每次行出嚟，佢都係非常誠懇。退休後，佢曾接受訪問，講到道歉同唔道歉嘅矛盾時，佢講咗幾句說話：

「我覺得應該做的事就要去做，當然，做了之後如果有壞的後果出現，就要考慮自己是否承擔得起，實際上真的要這樣做，不可以逃避。」

昔日嘅Sorry Sir鄧竟成，今日已為全國政協委員。佢喺6月11日，讚揚警方於第一次反送中遊行後，「香港警察喺當日來講係幾咁克制」。至於612後，鄧竟成未有露面，唔知佢而家點諗。

by千頌C@堆填區
http://fb.com/winbigwok