香港攝影記者協會今日舉行「前線.焦點2017」新聞攝影比賽頒獎禮，亦為新聞攝影比賽展覽開幕。幾年前出席過頒獎禮嘅特首林鄭月娥再度現身，佢致辭時唔單止串爆同場嘅前高官、港區人大代表譚志源，仲讚自己身體力行重視新聞自由。

確實林鄭做局長、做司長嘅時候都出席過攝協嘅頒獎禮，甚至佢係香港第一位出席攝協頒獎禮嘅特首。佢致辭時候仲話，正如一張相勝過千言萬語，身體力行亦都勝過千言萬語，佢希望透過出席傳媒舉辦或同傳媒有關嘅活動話畀大家知佢對新聞自由嘅重視。呢吓抽擊唔知林鄭嘅前上司收唔收到呢？

話鋒一轉，林鄭講到「有圖有真相」呢個話題。佢覺得而家社交媒體、智能電話發達，人人都好易獲得資訊，而過程中畀人睇到現場情況嘅相片相當重要，事關有時圖片比文字更有說服力，亦因為智能電話普及，所以人人都可以係記者。

跟住佢仲話好多時啲官員鍾意話文字報道斷章取義，「譚志源都講得唔少㗎呢句說話（斷章取義）」。之但係佢又舉出「批鬥座」做例子，解釋有時候圖片都可以斷章取義，正如相片未必反映到無讓座嘅人嘅實況，所以一般人影嘅相同攝記影嘅相不能同日而語，專業攝記影嘅係反映真相、唔會譁眾取寵、符合一定道德標準、仲要有視覺上嘅吸引力及情感上嘅感染力。

八方聽完都不得不承認林鄭呢段演辭幾犀利，自嘲、抽水、送高帽同埋貼地都具備，希望正如佢自己所講，身體力行勝過千語萬語啦。

順帶一提，有興趣嘅朋友由今日起至14號，可以去浸大傳理視藝大樓顧明均1樓展覽廳，睇吓今年嘅得獎作品，《蘋果》唔少攝記都得獎架﹗