當今天下，搵邊個同美斯比，都好難唔被比下去，但話晒香港球迷都叫幾熟識基士文，前日睇巴迪主場吞巴塞隆拿5蛋，不期然將佢同細佢8年嘅美斯比較。唔比猶自可，一比就大件事，除咗用佢被美斯KO，打到瞓直，真係諗唔到用咩字眼嚟形容，睇見都心酸。
我求大俠賽前睇晒資料，基士文足球生涯最肉酸一幕，係06年世界盃代表塞爾維亞和黑山吞阿根廷6蛋，嗰場波基士文唔止輸，仲領紅牌被趕出場；反觀美斯喺嗰場波射入個人喺國際重要比賽嘅第一個入球，真係此消彼長。痛苦嘅歷史喺禮拜三歐聯H組賽重演，基士文今場波踢波時間唔多，如果齋睇精華，可能只睇到佢有球左路出波貼門得滯；美斯就精神得多，當主隊球員麥森禾洛高擺烏龍，加埋柏度洛迪古斯入波後，美斯近門頂成3:0。呢個入球，係美斯自09年歐聯決賽以嚟，第一次再喺歐聯用頭槌入波。

美斯登巴塞史上第2人

有頭頂，自然有腳踢，美斯下半場抽射成4:0，加埋韋拿完場前埋齋，喺人家地頭派5隻蛋，都幾唔畀面。怨就怨巴塞喺第1輪主場失威俾AC米蘭逼和，今場大反撲，巴迪、基士文時也命也。假如基士文以後喺球場上再遇美斯，怕且佢會掉頭走。
呢場波之後，美斯喺巴塞已經累積入194球，追平匈牙利名宿古巴拉嘅入球數，並列歷來巴塞第2入波多嘅球員。
「我好開心可以同一個球會好重要嘅人物睇齊，但老實講，我今日只係同平時一樣盡力而為。」美斯講得好淡然，梗係啦，佢入波當食生菜。距離巴塞史上入球王施薩洛迪古斯嘅235球，好似仲好遠，但美斯有嘅係青春，紀錄遲早由佢破。