張敬軒噚晚喺紅館舉行第三場騷，軒仔嘅分身假．天后「降兩度」，請來真．天后陳慧琳（Kelly）做嘉賓，降兩度介紹Kelly出場前抵死說：「幾年前出過隻碟叫咩，粉紅大菊花？唔係，正確係《粉色大理花》。裏面翻唱咗好多歌，其中一首係我偶像嘅歌。」

跟住着到好似花樽嘅Kelly登場，兩人合唱《風花雪》後，降兩度鬼馬地跟Kelly比身高，着咗高踭鞋嘅佢自認高過Kelly，但Kelly就冇面畀，一臉嫌棄忍住笑話：「真係冇可能。」之後降兩度又嗲聲嗲氣問Kelly：「我靚唔靚？其實我同你有好多共通點㗎。」搞到高貴嘅Kelly尷尷尬尬話：「我真係唔識答...共通點？冇㗎，一定冇㗎！」

降兩度伸出光管腳，得戚話：「我同你都有條長腿啊，我好乾淨㗎，你摸下，想你教我點keep到一直條腿咁靚？」估唔到Kelly居然踎低身，一手摸腳降兩度大髀：「原來你有着絲襪㗎？嘩，你仲話自己乾淨？呢度剃唔乾淨啦。」降兩度大聲反駁：「冇理由呀，我剃得好乾淨㗎喎，上面下面都剃齊…哎呀，天后面前就唔好講呢啲，我想話好鍾意你兩個仔，我係佢哋fans，不如搵日你帶佢哋出來同我一齊飲茶啦。」Kelly馬上拒絕：「唔好啦，你太得人驚啦，會嚇親佢哋就唔係幾好啦。你最好落番去整下容先上來啦，你頭頭尾尾都整下啦....」全場爆笑。

此外，噚晚王祖藍同老婆李亞男都有捧場，降兩度見到祖藍搞笑話：「喺我退出之前，你哋可以睇住王祖藍扮女人先，王祖藍，你覺得我靚啲定你靚啲？慳d啦baby！我一定靚過你，不過我腿就長唔過你...你老婆呀！哈哈！」

精選娛聞，喺晒《娛果》 http://fb.com/appledailyent