彭于晏、余文樂、導演郭子健跟黃智亨噚晚齊到銅鑼灣時代廣場出席有份主演嘅電影《悟空傳》首映，衛詩雅、楊受成夫婦都有嚟撐場。

彭于晏接受訪問時，被讚係最靚仔嘅孫悟空，佢話:「15年前跟余文樂拍《愛情白皮書》(台灣版)，當時沒有人讚我靚仔，好開心15年後再次相遇合作，不在乎票房，只要自己努力過及再次一起演出。不覺自己靚仔，如果是的話那就要多謝父母及導演拍得我好。」

身邊嘅余文樂亦認同彭于晏喺最高大靚仔嘅悟空，不過佢話彭版悟空就高咗啲:「悟空應該好矮，你話我係最大波二郎神，咁樣講我認咗佢先啦。以前好似冇人拍過。」不過有人指出何潤東同樣演過之後，樂仔話:「咁佢係重量級，我係『乳』量級。拍完之後冇特別保持番身形，但都有做運動。」佢話女友「皮帶千金」王棠云都喺台灣睇過套戲，對方有做開運動，所以知道要保持呢種身形係好辛苦。

衛詩雅話近幾個月好忙，因為10月前要完成4部戲，佢話:「上半年冇嘢拍，7月之後忽然有4個角色要演，要做好多功課，成日要喺屋企閂埋門諗對白，媽咪以為我精神病發作。」詩雅話喺房時要諗埋對手嘅對白，所以媽咪就拍門問係咪有朋友嚟咗，以為帶咗男仔返屋企，佢話:「媽咪又擔心我抽離唔到，好似精神分裂咁，好在角色唔係好沉重。」詩雅透露稍後會去東京拍戲，爹哋話會過嚟探班，雖然明知佢係想借機去旅行，不過都好開心可以陪下屋企人。