今年48歲伍詠薇（伍姑娘）同老公練海棠結婚多年，一直恩愛，舊年練海棠被發現暗媾長髮女，好在EQ極高嘅伍姑娘，最終原諒老公。

雨過天晴後，兩公婆人前不時放閃，最近佢哋就去咗泰國曼谷度假充電，伍姑娘連日仲喺微博同Ig上載三點式靚相，騷吓弗爆身材，仲晒同老公練海棠黐到實嘅合照。

伍姑娘貼出三點式水着相後，連何佩瑜都大讚夠索，伍姑娘自稱係「五索」，佢今日回覆《蘋果》時話：「我呢個年紀，算係保持得幾好，世上係冇免費午餐，我比一般同年齡女生或後生女勤力，我平時戒食澱粉質，只係食菜同魚。」

目測伍姑娘個胸係C cup，佢話：「我呢排瘦咗，個胸縮咗一cup，以前肥肥哋就C cup，o依家坐B望C，不過o依家泳衣承托力幾好，咁我爛船都有三斤釘，效果出嚟幾豐滿。」