英超利物浦即將落實由羅馬簽埃及翼鋒穆罕默德沙拿，據報呢位有「埃及美斯」之稱嘅準紅軍新兵，將會選用9號球衣。咪話唔預先警告，近年著親9號嘅利物浦球員，發展都係嘛嘛哋，小心「9號魔咒」。

紅軍著名9號射手有魯殊同科拿，而費蘭度托利斯亦算係表現好出色嘅9號前鋒，不過佢離隊都已經係6年前嘅事。紅軍之後先後有安祖卡路爾、列基林拔、伊亞高艾斯巴斯同埋賓迪基著過9號，佢哋4個加埋一共踢咗112場英超比賽，但只係入咗17球。穆罕默德沙拿唔係正宗前鋒，希望佢著9號，唔會受呢個魔咒影響到啦。