家陣資金退潮市，三類股份最傷：一、賣未來的公司。當大家都低着頭，拚命拉住自己的泳褲，以免最先出洋相，誰還有閒情遠眺外面的花花世界？錢多人傻時，故事吹到幾大都得，收入盈利？依家無，但將來會有；如今勒緊褲頭，人自然醒哂，燈油火爉逐樣計，咁就係泡沫終結時。

二、高估值公司。市衰行路打倒褪，壞消息特別多，而且放到宇宙咁大。一個政策修訂，教育股全板就洗4至5成。其實呢類政策風險，招股書都有提及，為何當時無人理，家陣就隊到飛起？原因一句到尾，就係貴。當舊年股王吉利（175）腰斬、騰訊（700）蒸發3成、恒指都唔見2成時，教育股值40倍PE？呢個大家都知，但作為避險板塊，敵不動我不動，一旦有人揭竿起義，大夥兒就一哄而上。今個星期，小心物管股，個別開始「暴動」了。

三、周期股。話說新興市場2月份開始插水，貿易戰4月先開波，航運股第二季已開始「奶嘢」。魏力上周五去海豐（1308）業績會，公司首季航價單價有雙位數增幅，次季得番低單位數。管理層直言「資本市場（即係股市）表現開始影響實體經濟」，客戶轉趨審慎，嚴控成本，自然加唔到價。再者，土耳其等多國近期爆發貨幣危機，會否傳導至各新興市場？管理層雖說結果難料，但認為「機會在升溫」，小心。

筆者為證監會持牌人，未持有上述股份權益。
魏力
www.facebook.com/2012jason