當年今日

阿、德、英、西互串諗得過

蘋果日報 2002/06/10 00:00


上個禮拜「英阿」及「中巴」兩場大戰,分別開出正路戰果,對博彩公司嚟講都可謂得個「做」字!今日再介紹大家世界盃決賽連贏位四大抵玩隊伍,互串四條飛最少都有近九倍分頭。
但凡戲碼吸引嘅賽事,更加會激起球迷投注意欲,上個禮拜英格蘭對阿根廷,以及巴西對中國兩場大戰,賽前各大博彩公司都預期能夠帶來一定進帳,「英阿之戰」更加刷新咗部份公司嘅單場收受投注記錄㖭。不過,呢個如意算盤睇嚟未必打得響喎,始終英格蘭擁躉多過阿根廷球迷,呢場波嘅「首個入球者」彩池,相信大部份注碼都會去咗英格蘭嘅奧雲仔同埋萬人迷碧咸身上;當碧咸射入十二碼打開場波嘅記錄,呢個有成七至十倍分頭嘅派彩,就令到部份「單位」隨時有賠突嘅可能。

中巴戰有莊家爆煲
外圍莊家雖然無開呢啲「首個入球者」盤口,無咗呢個風險,但係到星期六「中巴大戰」,巴西讓兩、三球嘅上盤睇嚟亦有被煲爆之嫌,聽講就有部份外圍佬喺呢場波之後唔見咗人,你話咩原因呢?
繼續噚日未完嘅話題,講到玩世界盃連贏位,博彩公司喺推出呢個彩池嘅時候,都會將兩條晉級路線嘅球隊分開,以免兩隊最後根本未能喺決賽碰頭,而令客戶覺得有取巧之嫌。

4隊串4條飛有分頭
賭馬買Q我就對四串六情有獨鍾,世界盃我亦會揀四隊互串,噚日就介紹咗兩支抵玩決賽隊伍阿根廷同埋德國,再揀多兩隊我會要埋同樣有一定分頭嘅英格蘭及西班牙,每條線各兩隊,互串都係四條飛,最少嗰條都有八、九倍分頭,諗得過吖!
文:華度