【七警罪成】梁美芬:暗角圍毆「非故意」 還擊非尋仇可輕判
梁美芬七警沈智慧
7名在傘運時毆打示威者曾健超的警察,被裁定「襲擊致造成身體傷害」罪成。雖然法官認為,7警將曾健超抬到變電站的目的,就是要襲擊他,惟經民聯梁美芬昨在商台節目卻稱,7名被告「唔係有心去做嗰件事(毆打傷人),而是執行任務時,「有人去刺激佢(哋),甚至用到警隊完全冇辦法接受嘅侮辱形式」,認為7警可以此理由求情輕判,以維護警隊尊嚴。
梁美芬說,7警「呢個錯,第一唔係故意,可能係受咗環境刺激之後……刺激到一個反應出來,去到一個好大張力」才犯,認為他們非為尋仇,而是被曾健超潑有味液體後,「唔知會唔會有危險嗰喎」,故「喺大環境底下……可能要還擊」,應可求情。
節目主持質疑梁美芬的說法,認為只要重判曾健超,已可收阻嚇力,維護警隊尊嚴,無須為此而輕判知法犯法的7警,又反問若輕判7警,會否變相鼓勵「執法者越界也情有可原」,向社會發放錯誤訊息。
梁美芬反駁稱「你唔覺得(7警)個懲罰已經好重㗎咩?」舉例指部分被告「連退休金都無埋」,單是留案底,已損仕途,又指過往有警察犯罪,都會向法庭求情,理由是「對呢個社會有好大貢獻,比如查案破案都係為社會㗎,呢啲都係可以求情嘅」。
有網民隨即回顧裁判官謝沈智慧,在4年前審理警司黃冠豪瀆職案時的金句,反駁梁美芬。沈當時狠批黃違反誠信,令警隊蒙羞,她不認同辯方指黃對警隊「無功都有勞」,拋出一句「警察唔係免費服務社會㗎,they are well paid for it!(他們獲優厚薪酬!)」,傳頌一時。