專欄作家李純恩近年再拾起畫筆，隨心所畫，終於喺今年舉辦首個個人畫展，名為《畫由心生》嘅畫展特別揀喺今日3.8婦女節開幕，原來3月8日更加係李純恩結婚33周年紀念，認真別具意思。

畫展開幕，各界捧場者眾，查良鏞太太、林建名同方力申等都有到賀，其中一幅畫特別吸晴，主角係一隻猴子同豬女，有啲打情罵俏FEEL，原來李純恩屬猴，李太周寧則屬豬，似乎係畫緊佢哋噃。李純恩笑稱自己嘅說話，太太聽唔入耳，所以作畫寄意（到底乜意思？睇下幅畫就會知）。

李純恩講笑咁講過，希望60歲後可以賣畫養老婆，李太就甜絲絲咁話，老公近年先開始畫畫，目前要靠畫養家，當然仲未可以啦！

想欣賞李純恩畫作嘅，即日至22日喺中環荷李活道嘅「一畫廊」有得睇。