董特首比喻自己的部長新班底為一支球隊，但不是擁有粒粒巨星卻吞蛋出局的衞冕隊法國。法國隊輸得太快，死因還有待驗屍報告。但開幕戰先輸頭威，遭初次擠身32強的塞內加爾一球搞掂，是致命的挫折。塞隊接着愈戰愈勁，老董會不會睇中這支法國二隊，想師法西非雄獅，將政府總部當成世界盃球場，把遊戲球例徹底反轉？

咁就要諗過。事關塞隊八強對撼土耳其，全軍fullteam，但無復勇態。原來塞隊輸在爛滾，經常流連紅燈區，教練把他們的老婆女友緊急召來。但後者管束無方，塞隊照樣放肆縱慾，結果遭紀律嚴明的土軍破陣，四強不入。塞隊出局後，飢餓獵食，過境台灣才只有30個小時，答應跟台隊打一場表演賽。但塞隊收了出場費，卻不肯落場，轉頭聯絡淫媒，將近千萬台幣的出場費用來打了床上戰。台灣網站爆料，指塞隊對妓女提出諸多需索，跡近變態。與塞隊打友誼波的，是跟塞國無外交關係的大陸妓女。神州波雖然不濟，還是比寶島勝一籌，塞隊揀擇，難怪台灣同胞扯火了。
董班子中，個個道貌岸然，私生活應該不會出亂子。查實球迷懶理球星爛滾，至緊要踢出個人魅力，球技煞食。年薪媲美球星的部長縱使唔爛滾，但淨識拍馬屁，落場游魂兼鏟空氣，點會贏波？球會主席就算是白癡都會曉得，是時候換人、炒教練了。