邊個話包租公一定無良心？最近就有三個非牟利機構，包括研究生死議題嘅啟民創企、培育年輕人藝術發展嘅誇啦啦藝術集匯以及港人好熟悉嘅Pokeguide，以超超超超超特惠租金進駐希慎興業嘅禮頓中心開office，面積仲要有800到1000平方呎；嘩，銅記黃金地段甲級寫字樓卻有特惠租金，羡慕死人咩？

據知誇啦啦藝術集匯因為政府去年收緊工廈用途條例，令佢哋唔可以再喺原有辦公室做綵排，好在獲希慎興業幫助，先有返個固定地點進行綵排。啟民創社共同創辦人李欣琪就話，本來想要300幾呎嘅辦公室，而家喺禮頓中心嘅辦公室卻多咗接近三倍嘅空間，團隊已將辦公室轉化為展覽場地，展出學生習作兼做工作坊。

希慎興業寫字樓業務及住宅業務總監葉慕貞話呀，公司特別撥出空間以特惠租約租畀非牟利機構，希望為社區帶來顯著同正面影響。