美國政府上個禮拜公佈咗將1250億美金注資9大銀行，幕後策劃嘅主將之一，除咗財長保爾森或聯儲局主席伯南克，仲有聯儲局最年輕兼最叠水理事KevinWarsh，佢行年37歲，兩年前起成為聯儲局理事。
呢位Kevin並非泛泛之輩，外父係EsteeLauder化妝品大亨RonaldLauder，Lauder喺《福布斯》美國富豪榜內位列118位，身家34億美金（約265億港銀）。外父家底厚，Kevin兩夫婦亦唔弱，據《彭博》報道，夫婦06年身家合共有6200萬銀美金（約4.8億港銀），比其他聯儲局理事加埋仲要高。

調停美聯銀行爭奪戰

Kevin之前曾經喺大摩做過賓架，又喺白宮總統府做過助手，所以政經脈絡豐富，加上佢係理事會入面唯一喺投行度打過工，所以今次金融海嘯，畀伯南克委以重任，處理投行危機。早排花旗同富國銀行爭奪美聯銀行，佢就俾伯南克派去從中調停。