彩星集團（635）自舊年初以嚟，一直處大跌浪，股價由05年2月高位跌到今年低位0.67元，唔見咗接近2/3。近呢兩三個月，隻股終於見起色，噚日更大漲6%，收報0.86元，升5仙。網上又見散戶議論紛紛。
喺「香港討論區」入面，網友cjumbo睇好隻股年底見1.30元，佢高呼：「未入嘅朋友快入啦，我今日0.84再入咗100K，now平均價係1.0725（快返家鄉）」。
nala2都對隻股充滿憧憬：「今日成交突然大增，睇住1蚊先啦，都有唔錯升幅。」小花至愛亦係捧場客，佢話0.81-0.82元時已建議買入，自己最近亦有收集呢隻股。

下半年料可扭虧

彩星核心業務係從事玩具及家庭娛樂產品之設計、發展、市場推廣及分銷。美國係集團嘅主要市場，由於美國今年上半年零售市場疲弱，加上油價及內地薪酬上漲，集團8月中公布中期業績，如果扣除物業重估收益，上半年錄得經營虧損3200萬元。不過，美國零售市道已見復蘇，加上集團一向有近7成嘅銷售額係嚟自下半年，相信全年業績可以扭虧為盈。
技術走勢上，隻股自6月中見近期低位後，反彈浪底一個高過一個，保歷加通道經過10月份收窄後，噚日以大陽燭裂口升穿中軸，同時向上撐闊，係向好先兆。同時，10、20同50日平均線亦已現黃金交叉，現價企穩3條平均線之上，加上MACD現雙牛訊號，RSI及股價同時升破短期降軌，技術指標全部向好。另一個利好訊號係噚日成交股數係9月初以嚟最多嘅一日，反映買盤漸見活躍，短線挑戰1蚊可期，跌穿0.80元止蝕。
余文