陳瀅與羅仲謙今日喺又一城出席figure公仔活動，著住若隱若現白色透視裝嘅陳瀅，仲話自己係真空上陣，咁男友合猷亨會唔會介意先？佢就話做嘢分得好開喎。

咁大會就邀請佢哋各自揀份禮物畀至愛，陳瀅就揀咗蝙蝠俠嘅cushion，不過就唔係送畀猷亨，而係送畀猷君喎！佢話：「聽阿君（何猷君）講佢好鍾意蝙蝠車，好有型，話如果第時有車牌都想買一架。」呢位未來大嫂真係好細心，愛屋及烏喎，唔怪得咁入屋，連四太都讚好。

問到陳瀅點解唔揀禮物畀男友何猷君？佢話：「佢冇o架，總之成日聽到阿君講成日想要，咪揀個cushion畀佢。」咁有傳猷亨送豪宅同埋四太梁安琪恨抱孫呢？陳瀅就一概唔回應，果然係戀得「低調」。不過隔離個羅仲謙仲搞笑同陳瀅講：「不如你試下講『承你貴言』呀，呢句好用呀。」點知被陳瀅拒絕咗：「我都係鍾意『唔回應』多啲。」唔...提起男友，果然好認真。