韓國男神金秀賢孖Sulli、成東日等人主演嘅新片《Real》，於噚日正式喺韓國上映，不過電影卻有唔少負評，令孭飛嘅金秀賢都大感壓力。《Real》噚日首映卻只有逾15萬人入場，不敵同日開畫、由韓劇《Signal》男星李帝勳主演嘅新片《朴烈》，《朴烈》亦憑逾22萬人入場成為當日票房第一。

至於曾執導《韓流怪嚇》、《末世列車》等韓片嘅著名導演奉俊昊，其新作《玉子》噚晚率先喺Netflix推出，並於今日起於全韓國共84間戲院上映。由於《玉子》大受好評，目前以19.16%預售率排第3位，僅次於《朴烈》(33.82%)及《Real》(22.43%)。

另外，金秀賢喺首映後受訪時坦言因觀眾對《Real》嘅負評感到唔開心：「老實講見到呢啲反應都會覺得傷心，雖然電影的確令人好陌生、好困難，但我認為呢啲都係電影喺定位時會產生嘅事，而呢個係我渴望、想嘗試嘅角色，我亦認為我已經做到最好。」金秀賢又指所屬事務所當初唔想佢拍床戲：「不過我認為作為一個演員，應該喺冇任何限制之下去演繹角色，亦好彩公司尊重我嘅決定。」