都唔明白點解巴西成日都有球員親屬俾劫匪綁架事件發生，但嗰邊嘅警察都遏止唔到，好似今季加盟AC米蘭，着起舒夫真高件7號波衫嘅奧利華拉，佢家姐莎華就成為咗最新嘅受害者！到𠵱家仲未知班綁匪想點，真係擔心死人。
今次綁匪嘅手法更加係猖獗到離晒大譜，消息話班綁匪孭晒成副架生，着到好似武裝分子咁，喺深宵時分闖入莎華位於聖保羅北部住宅區嘅屋企，先將佢老公同個8歲嘅仔綁起，然後擄走莎華。人哋小朋友得嗰8歲，班綁匪認真冇人性，咁樣嚇一嚇真係隨時有童年陰影，最慘係仲要擔心媽媽嘅安全，搞到我求大俠都戥佢心痛。
事件都發生咗成兩日，但到家吓都仲未知班綁匪想點，身在家鄉嘅家人固之然非常擔心，就算係遠在意大利嘅奧利華拉都唔好過，一來喺球隊仲未踢番起，二來仲要整多單咁嘅嘢，睇嚟佢都有排煩。