德國前晚完場前一刻擊敗波蘭，球迷開心到通宵慶祝。好在第二朝係德國公眾假期，全人類都唔使返工，瞓幾晏都無乜所謂啦！
有人歡喜有人愁，波蘭提早出局，部份球迷不滿球隊表現，竟然喺球場附近搞事，最後要勞動德國警方鎮壓；波蘭今次輸波兼輸埋體育精神，足球流氓又多一個例子。
唔知係咪同大戰過後有關，第二日早場嘅厄瓜多爾對哥斯達黎加，氣氛真係有天淵之別。原本有線直擊隊打算喺法蘭克福河畔大電視進行直播，但附近得幾十個球迷，些少氣氛都感受唔倒，打算另覓場地進行直播。

賽期太密球迷要唞唞

呢場比賽，由一支南美球隊對住一支中北美洲球隊，兩隊仲要屬美洲內嘅二線隊，想搵好氣氛除咗漢堡呢啲大城市附近，德國其他城巿都好難再搵到。世界盃差不多日日有比賽，球迷停一場休息片刻，揀呢啲戲碼都算係最佳選擇，所以無咩人嚟睇直播都無可厚非嘅。不過我哋直擊隊最終仍然決定留喺法蘭克福，因為呢個德國城市嘅建築物都比較靚，今次我哋選擇喺一條橋上面直擊市內嘅氣氛畀大家。
喺法蘭克福河畔進行直播有個好處，就係位於巿中心；加上有座巨型摩天輪，景觀都算唔錯。若然無比賽嘅日子，呢度都係一個唔錯嘅旅遊勝地。尤其開始入夜嘅時候，係河邊嘅magichour，分分鐘靚過香港嘅維港景。不過，德國夏天嘅magichour講緊係夜晚10點幾，同香港6、7點比較，別有一番風味。
有線06世界盃嘉年華，將於今晚7:00pm——9:00pm，播出世盃外景隊採訪滙報