當年今日
關於我們

【李八方online】袁彌昌或拍田少平台戰港島 搶葉劉票真正「對着幹」

蘋果日報 2020/03/30 13:58

田北俊侯志強曾俊華葉劉淑儀王維基田北辰李八方ONLINE袁彌昌容海恩潘焯鴻

人人都話「中間票」冇市場,但如果有前財爺曾俊華同自由黨榮譽主席田北俊等開明建制派「祝福」,會唔會仲有一定叫座力?

田少組平台薦人選立會,勢在必行;「給香港一個希望」,呢個slogan開始入屋。據知平台目前正向各方合適人士招手,而因為政見不同而辭任新民黨政策總裁嘅袁彌昌(Derek),都係田少羅致對象,雙方開始探討緊合作嘅可能,包括Derek係咪披甲戰港島?皆因平台評估過,港島嘅淺藍同淺黃「中間票」唔少,上屆高票落敗嘅王維基正正兩邊攞,今次若有田少同薯片叔加持,凡事沒有不可能,至少肯定可以搶走葉劉淑儀一啲票。

至於其他區,據知新西有田少細佬、同屬開明建制派嘅田北辰再戰,平台未必會出人;九西則有可能由中科董事總經理潘焯鴻做代表。九東方面仲諗緊,至於新東就難搞啲,未見合適代表之時、亦度緊夠唔夠票攞一席,但幾可肯定就唔會由上水鄉委會主席侯志強代平台出戰……侯強真正吸票能力如何,精明如田少,點會唔清楚?

作為政圈花生友,應該期待Derek喺港島「響戰鼓」,皆因屆時除咗自己可以同葉劉真正「對着幹」,甚至又可以代被葉劉以初選篩走嘅老婆容海恩「報仇」。八方問過Derek,佢承認了解緊田少個平台;至於係咪港島出戰,佢明言:「積極考慮」。

有政界中人相信,一旦田少呢個聯盟有議席落袋,目前同自由黨貌合神離、唔跟張宇人支隊嘅紡織界鍾國斌,隨時投入更啱key嘅田少懷抱,再做返議會「真●關鍵少數」嘅角色。

-----------------------------
【武漢肺炎】專頁
全民自救 抗疫資訊盡在《蘋果》
-----------------------------
無懼警暴 學懂自救
《抗暴之戰●法例須知》讀果 上架