特首777抗疫工作應做唔做,封關唔止慢半拍仲半桶水,然後引用防疫版「緊急法」,懶係參考外國例子,先限食肆客量,再禁市民四人群聚,但對一班民區議員嚟講,地區工作見街坊係日常工作,難免會聚集多過四人,再加埋呢排差人對民主派區議員特別「關照」,如何唔俾popo針對之餘,又可繼續服務街坊呢?會唔會搞到佢哋因為咁做唔到社區服務,甚至連喺社區做防疫抗疫工作都隨時變犯法?有人計劃以後落區就要「三人限定」,仲有人計劃將社區支援悼念、抗爭be water化,總之唔俾popo有位入。
八方問過元朗區議員張秀賢,佢就即時話「咁我哋三個人做囉,如果有街坊行多兩個埋嚟,咁我哋有個就行開」,但佢話如果做抗疫街站,其實應該有豁免嘅,不過佢同樣都驚今次畀機會政府權力無制衡膨脹,特別借啲意針對黃店,所以都會去區內探吓呢啲舖頭,提佢哋之餘仲會順便做埋選民登記。