民主派正就新東初選鬥得如火如荼之際，八方聽聞，青年新政有意支持傘後團體「社區網絡聯盟」發言人、沙田社區網絡主席劉頴匡出戰新東補選，有指劉已經接觸民主派政黨同本土派人士，預計會喺周六召開記者會公佈詳情。

八方問過劉頴匡，佢承認積極考慮參加補選，未來兩日會同自己嘅組織成員以及其他民主派友好商討，之後再作公佈。佢話呀，由於青年新政早已表明不支持初選，而佢自己亦無意參與初選，期望若然出選的話，可以反映本土派聲音，亦能與泛民有偈傾。

聲稱獲青政和本民前支持出戰民主派初選嘅張秀賢就強調，自己係青政同本民前認識合適嘅人選，但若佢哋有新決定，亦會尊重；佢又認為，本土派要慎重思考選舉策略，並爭取民主派支持，若處理不善，議席有機會落入保皇黨手中。

其實劉頴匡同另一新東民主派初選候選人、新同盟范國威都有淵源，事關劉多年前曾經係新同盟社區主任，當年因發起收集聯署要求中大退聯，與范國威爆發罵戰，最終退黨收場，而家兩人有機會再次同台出選，八方都非常期待。