真係唔係ATV嘅fans，真係未必知，賬目現時「充滿紅線」嘅亞視，無限復活再復活，唔止有員工有人工加(只係加俾乖嗰啲、同「有表現」嗰啲」，仲開新台——數碼頻道「歲月留聲」(選台號碼：13)。好彩，係數碼頻道咋﹗

呢個新頻道由除夕開始run，24小時運作。亞視官網介紹呢個台係「網羅多部膾炙人口的亞視經典戲劇及綜藝等作品予觀眾欣賞」，觀眾可於12月31日晚11:30p.m.後，透過重新搜索數碼頻道，再次啟動13頻道，就可以取得「歲月留聲」嘅訊號。換言之，亞視用重播N次嘅舊節目，同你哋一齊迎接2013年呀﹗

咁仲未講，呢個「歲月留聲」播足7日、每日24小時「全天候」運作，周一至周五每晚6點半將首播5.5小時、共六個不同類型嘅節目；周六及周日呢，就會以5集重溫嘅形式，係，係睇5集，重溫周一至周五播出嘅精采節目。

咁即係有咩睇呢？戲劇方面，有呢個「名製作人系列」及「星星回憶」等系列形式，推出由不同著名製作人監製及藝人主演的經典劇集。包括﹕
《變色龍》系列、《浮生六劫》、《大地恩情》、《鱷魚淚》、《大俠霍元甲》、《馬永貞》、《陳真》、《天蠶變》、《浣花洗劍錄》、《大內群英》、《再見艷陽天》、《碧血青天楊家將》等。

綜藝節目方面，都有0架，包括﹕
三大才子黃霑、倪匡及蔡瀾主持嘅《今夜不設防》
曾志偉同林敏驄主持嘅《開心主流派》
仲有，《ATV亞洲小姐競選》……

呢個channel仲有「與星光同行」系列，有咩睇呢？係粵語長片。啱唔啱你個channel？

有觀眾留言話﹕「以為有新0野睇，原來係炒超級舊冷飯。睇南方衛視好過啦!」

歡迎去ATV官網反映/提供意見。