當年今日
關於我們

【得獎名單被消失】兩部港產片遭河蟹 《十年》監製:香港電影有一個新氣象

蘋果日報 2017/04/10 14:03

十年河蟹樹大招風監製蔡廉明

今年金像獎最佳電影《樹大招風》嘅命運,同去年金像獎最佳電影《十年》去一樣,喺大陸各網站嘅金像獎得獎名單之中被消失。就算林家棟憑《樹》片贏得最佳男主角,連同三位《樹》片導演贏到最佳導演,喺大陸嘅網入面都只係有得獎人嘅姓名,片名完全被河蟹。有人話係因為片中講到大陸嘅貪污所以出事,亦有人話係因為《樹》片其中一位導演歐文傑,正正就係《十年》其中一位導演,所以受牽連。而另一部噚晚嘅得獎片《點五步》,都因為戲中有雨傘運動場面,所以戲名都同樣被消失。
《十年》因為被喻為香港預言書,觸犯到大陸的禁忌而被封殺,對於《樹》片嘅遭遇《十年》監製蔡廉明今日接受電話訪問,佢話:「《樹》得獎未必係《十年》翻版,歐文傑喺之前已經參加咗《樹大招風》嘅計劃。其實近年年青導演多咗機會拍港產片,佢哋將對香港感覺寫落嚟,好想關注返香港本身問題,作出唔同題材探討,港產片可以話進入一個新浪潮或者時代,上一代好多笑片、警匪片、黑道片,題材豐富咗,電影有一個新氣象。大陸封殺冇辦法,但今年電影金像獎嘅結果,對香港電影係好事。」
有圈中人話今年嘅金像獎得獎名單,充份展示出本土電影抬頭。合拍片喺頒獎禮嘅大獎全軍盡墨,就連曾國祥嘅合拍片《七月與安生》獲12項最多嘅提名,最後只得一個技術獎,多少都反映到電影人對合拍片嘅投票心態。亦因為好多名導演都一窩蜂去拍大製作嘅合拍片,令新晉導演有機會拍一啲低成本嘅誠意作品,形成新新浪潮時代誕生。