曼聯90年代「成軍」嘅七小福，係「魔迷」嘅集體回憶，當中萬人迷碧咸率先喺今朝8點幾抵港，有指碧咸會秘密出席今晚嘅晚宴，同一班兄弟聚舊。至於其餘五小福分別係傑斯、史高斯、畢特同尼維利兄弟，緊隨碧咸抵港。

佢哋今日現身機場一刻，大批「魔迷」已聞風接機，眾人浩浩蕩蕩坐車到下榻嘅中環東方文華酒店。稍作休息後，到下晝兩點三，「五小福」現身文華酒店大堂，但未見碧咸現身。等齊人後就分乘三架七人車到IFC機鐵站。

眾球星沿路都有講有笑，又同球迷一路行一路簽名玩自拍唱歌仔，非常友善。之後佢哋就搭港鐵到奧運站準備出席今日嘅活動。不過甫出奧運站時，一落車已經俾接近60個歌迷重重包圍，尤其港人熟悉嘅傑斯，更加寸步難行，反而史高斯就快步行先，眾人成功突破「迷」陣後，就俾大會公關安排喺休息室作準備。