按過往經驗，不少馬房踏入6月開始嘆慢板，但今季情況有變，在這時段大部份倉口仍算進取，就如過去大多提早收爐的蘇保羅，剛周日（24日）仍有「美麗寶貝」繼續贏馬衝頂，為何會出現這樣反常態？

其中一個可能解釋，就是今季有羅富全這位犀利無比的新人王，截至上次賽事已贏59W，其他練馬單位頭馬被攤薄未贏夠數，自然仍需努力。

方嘉柏上季埋單贏61場，不過除今季初威過一輪外，季中一度鬧頭馬荒，而最近又似失靈，自5月20日贏「跳出香港」以來一直食白果，今季暫時只得36W大落後，除非方仔真的不介意今季搵少一大截，否則在煞科前應有一輪反擊。

今期（27日）方廐出馬七匹，普遍戰鬥力不差，表現如何應可反映目前馬房精神面貌。

當中，第四場「萬馬歡騰」大前仗跑今戰谷草一哩，遇快步速跟前走極之不利，也不過輸半個馬位跑第四，所以翌仗轉跑泥地中距離，排13檔也可鬥至輸埋門一步。

不過，新近再爭同程又抽大外檔之餘，「萬馬歡騰」更不知何故初配頭罩，賽後鞍上人謂馬兒賽前顯得緊張，結果騎也不走，大敗不足為據。

今勻方嘉柏立即除去替「萬馬歡騰」頭罩，兼用到潘頓再跑谷草一哩，恨贏恨到出面。

另外，尾場「咪走寶」跑了谷草一哩六次全入三甲，上仗同程段段快開只輸馬頸，而三至五名「嘉應之友」、「平天下」以及「情趣」其後非冠即亞。

擁有如此優秀賽績鏈，今次「咪走寶」用黃俊減十磅，應可補中。