曾經跟余文樂傳不和嘅周柏豪、舊愛朱韻韻、連詩雅同鍾浠文，今晚喺銅鑼灣遊艇會出席一汽車及遊艇記者會，因為現場大風所以見到柏豪除低外套畀身邊嘅鍾浠文同連詩雅抵寒，好有風度。講到樂仔結婚，佢話：「替佢開心同高興，都send咗訊息畀佢，祝福佢，今日先知。搵佢食飯唔知佢係咪香港，我遲啲都要飛。男孩子成家立室，搵到最愛可以長相廝守，係件大事。我結婚差唔多一年，好明白佢嘅心情。會唔會係佢穩定落嚟？我唔會回答你呢個問題嘅。」問到鍾浠文會唔會覺得又少咗個靚盤，佢話：「我哋唔同類型，自己都有留言祝福對方。」周柏豪就話身邊兩位女士都係靚盤。

另外，朱韻韻話間中都有同樂仔聯絡，大家都係朋友，佢話；「朋友結婚唔會酸，至會替佢高興，都有send訊息祝福佢。」佢又話知道樂仔一路都鍾意小朋友，希望佢快啲生兒育女。佢自言都想好似佢咁搵到合適人選，目前有人追，但未有結婚打算，希望以事業為重。

更多娛聞，喺晒《娛果》
http://fb.com/appledailyent