香港小姐啱啱選完，講真，小弟同好多香港人一樣，已經無睇好多年喇。反之，小弟寧可繼續喺殼股堆中尋芳，好似隻第一天然食品（1076）咁，短短12個交易日由0.89元升至日前最高的3.95元，累積升咗344%，搵多三五七隻呢啲寶，身家追貼富貴港姐冠軍仲實際。

小弟粗略研究過隻第一天然，佢有四大靚殼特質，首先業務簡單（淨係做食品加工冷藏）、市值細（起動前約3.6億元）、貨源歸邊（之前供過股，供股後大股東揸75%），及成交長期疏落（起動前每日都唔夠100萬股成交），走甩呢隻？唔使驚，仲有隻一模一樣條件嘅候選佳麗——台和商事（1037）。敢講一句，呢隻三甲必入兼係最上鏡之流，絕對唔係攞豬肉獎之輩。
形態上，台和商事真係同第一天然爆升初段好似，佢7月23日出咗份轉盈為虧嘅全年業績後，個股價唔跌不特止，仲要大升，當日大漲逾兩成。跟住喺0.35元水平唞一唞後，到上個月29日，公司宣佈以折讓價0.29元配售4,300萬股新股，一宣佈配股後，又癲過，當日單日最多升超過五成，最搞鬼嘅係，宣佈完配股之後兩日，喺公司做咗超過26年嘅執董尹楚輝辭職唔撈，好明顯係一個轉手嘅先兆。
再數番嗰四大特質，業務方面，台和商事主要從事電子元器件經銷，不過，公司喺剛過去嘅全年業績度，將電子消費分部嘅音響及通訊等部門終止營運，仲做埋撥備，呢吓好明顯係一個淨身動作，無非都係為咗甩殼而做。市值方面，就算呢期個價上咗嚟，最新市值都係2.4億元，殼價都未到呀！貨源方面，先唔計手新股（因下個月底先完成），佢大股東劉得還已揸55.7%，南華工業（413）同南華金融（619）就分別揸咗10.31%及9%，加埋剛好75.01%，以現有股本計，條街一億股都冇，咁少貨，任挾唔嬲。成交方面，7月23日大升嗰日，都係得55萬股成交，基本上條街都冇貨賣，係喺宣佈配股後先多咗成交，但都係得幾百萬股。
綜合上述四大特質，都可以肯定台和商事已準備轉手，尤其係宣佈配股之後，走勢明顯轉強，唔好唔記得仲有4,300萬股，每股作價0.29元嘅新股下個月底出街，但都有咁多買盤不問價咁掃，反映呢手新股好大幾會係批畀新主，啲心水清嘅春江鴨就買嚟等轉手消息。
老實講，現水平摸落去都好值博，因佢最新NAV係0.53元，再加埋主板殼價4億元上去，每股最起碼值1.54元。記住係起碼，因為之前當炒嘅殼股如第一天然、萬達（169）、福記（1175）、西王糖業（2088）、朗詩（106）、方正數碼（618）等，全部炒到上大溢價水平，所以台和商事絕對有條件炒上去幾皮，一於趁佢剛起動不妨介入。

陳承龍
本欄逢周四刊登

肥佬黎有今日，全賴阿媽細個同佢講過乜？即睇最新一集《亂噏24》，話唔定幫到你！
http://bit.ly/appletalk24