孫耀威(Eric)同陳美詩(Macy)今年4月已於美國註冊結婚，請了不少海外親友觀禮。今日兩口子再於堅道佑寧堂、即Eric在香港的第一個教會，舉行婚禮。一對新人身穿禮服及婚紗，在神面前許下愛的承諾。

三位靚太李亞男、王君馨和鄺文珣擔任姊妹團，昨晚已舉行單身派對，眾女齊穿睡衣，當然性感欠奉，Macy留言道：「感謝我最美麗又有智慧的好姊妹，為我準備的，單身派對，性感欠奉睡衣派對」身為老公嘅Eric就話：「其實我之前都舉行咗，成班男人一齊飲下酒傾下偈，大家都好乖，班兄弟仲突然走咗去叫Macy嚟。」會唔會係因為太辛苦所以哮喘發作？Eric就話：「因為早排感冒，好番之後都釣返少少哮喘出嚟，不過都已經好感恩，今次只係有少少聲沙，嚴重起上嚟試過連訪問都做唔到會一路咳。」

Eric又講到今日哮喘病發，仲要唱歌引領花仔花女入場，好彩就冇咳，佢話：「真係好開心，今次想趕喺呢個教堂拆之前喺度搞婚禮有好多親戚朋友都喺外地嚟，又有好多好朋友，但個禮堂唔大，都唔係請到好多人嚟。加上只可以容納200人，可以請嘅人都有限，所以之後都會搵個大啲嘅會場再搞一次，希望今年內可以完成。」

會唔會想今年內搞埋個婚宴呀？Eric就話：「都想㗎，但係真係要搵到個適合嘅場地，自己計過一係就擺五圍，一係就要擺夠一百圍，冇中間位如果唔係會得罪好多人，因為好多圈內圈外嘅朋友都好想參與。」

到咗晚上七點左右，一對新人就離開教堂。