上載片段者亦留言話架電動輪椅係「Tesla 2018 new單人版,接受預訂」,不過當時情況就唔係講笑,因片段顯示電動輪椅行駛嘅路面較窄,尾隨嘅司機無奈全部要慢駛,以免撞到架電動輪椅,點知突然有一架電單車從左方爬頭,鐵騎士駛過先見到原來有部電動輪椅,好彩即時收到油先冇炒車,被爬頭嘅司機鬧電單車咁爬頭,隨時車死人嘛!不過亦有網民留言,話電動輪椅咁做害人害己,亦有人認為冇佢符,惟有慢車避免出意外。其實電動輪椅行馬路唔係第一次,之前已有大律師提醒電動輪椅使用者,電動輪椅雖不屬於任何汽車類別,毋須登記領牌及考取車牌,但唔代表可以喺公路行,如果證實涉案者危及行車安全,警方可根據《簡易程序治罪條例》起訴,罪成可被判處罰款5,000元或監禁3個月。