日前,薛家燕出席慈善活,分享人生的高山低谷,家燕姐大談婚後息影,轉戰到馬來西亞做錄影帶生意,遇上惡人恐嚇,之後離婚重返電視台拍《真情》,得好友黎小田幫她fight人工,與當紅小生同價,創造人生事業第二個高峰。
家燕姐婚後息影,由幕前轉到幕後做錄影帶生意,更是第一批港人到馬來西亞做錄影帶,家燕姐話:「嗰時我同朋友一齊做錄影帶生意,我攞咗無綫同麗的嘅劇集代理權,個市場好大,但啲翻版好犀利,曾經有人嚟到香港拍枱同我講『你嚟到馬來西亞因住!』去到馬來西亞有6個保鑣陪住我,住嘅酒店突然間熄晒燈,上台講嘢突然間冇晒電,好驚!我哋請咗緝拿翻版個阿頭,係一個警長嘅太太,佢喺屋企個花園洗車時,俾人開兩槍,死咗!」
家燕姐四十幾歲離婚,她母兼父職養活3個子女,心大心細下重返無綫拍《真情》,全靠大女支持:「嗰陣係戰戰兢兢,因為一出返嚟就要做奸角,唔知點算!有一日珊珊就同我講︰『媽咪,咁你去拍啦!我會幫你照顧弟弟同妹妹!』當時佢好細,識得咁同我講,我攬住佢喊,媽咪就係好想聽到有人支持。」
她說之後遇上圈中好友黎小田︰「我喺惠天賜同斑斑婚禮撞見黎小田,佢一見我就問︰『Nancy,你離咗婚呀?總之嫁俾我啦!有咩幫到你?』我就話,本來我想拍《真情》,但人工唔高,所以推咗!」黎小田就幫我搵藝員科嘅總管Ben Chan,問佢︰『你做乜烚家燕?俾咁奀人工佢?』之後第二日珍姐就搵我,仲俾咗一個當好小生嘅價錢我,哈哈!」
談到拍《真情》,雖然辛苦,但總算捱過,還令家燕姐東山再起,如果時光倒流,問家燕姐想改變什麼?她說:「我一生人係好開心嘅,之前有好嘅家庭,有個好嘅星運,3個好撐我、好為我著想嘅仔女,雖然離婚係最唔開心,不過倒番轉嚟講『冇呢個男人又點會有3個仔女呢?』初初好嬲佢,依家要多謝佢!嚟近希望快啲抱孫,啲女快啲結婚啦!」
-----------------------------
【你爆料,我課金!】
爆相:$500 爆片:$1,000
分清黑白 壹齊揭穿社會黑幕!
詳情: https://s.nextmag.hk/e/zg7VUk287Z
-----------------------------
【壹週刊Telegram,與港人同行,每日為你推送抗爭現場實況】
一手報料: https://t.me/nextmaghk
最新消息: https://t.me/NextPlushk
-----------------------------
【升級壹會員登記站 為你解疑難!】
沙田、旺角、荃灣、觀塘、銅鑼灣5區為你服務
詳情: https://s.nextmag.hk/e/Tssefy687Z