當年今日

專家睇相片 - 左丁山

蘋果日報 2002/01/21 00:00


一月十四日《明報》有一張朱鎔基與夫人勞安在印度泰姬陵前嘅合照相片,來自法新社。呢張相與《壹週刊》(上星期四出版,619期)第一百二十六頁嘅李鵬夫婦相片、朱鎔基夫婦相片,大致相同,但角度就有啲咁多分別。
攝影F睇過《明報》張相,再睇吓《壹週刊》嘅相,認為朱總理張相有疑點。佢講咗一大輪,左丁山先至明白一啲,姑作有聞必錄。
朱總理夫婦坐木櫈上,四隻腳有陰影,面位亦有,但係背後嘅泰姬陵就一片耀眼光芒,全無陰影,以攝影F之多年經驗,背景(泰姬陵)與前景﹙朱總理伉儷﹚嘅光線唔多夾噃。
睇吓李鵬夫婦,陽光前後一致,李鵬朱琳坐石櫈,面上無陰影,真係有啲唔同。至於夫人套裝咯喎,朱琳打扮入時,配合身分;勞安就太過樸素,件外衣扣鈕後顯得太窄,唔多似總理夫人外訪印度噃。
左丁山對攝影好外行,聽完就算,唔敢置評,事關攝影F為咗影相,走遍大江南北,半個地球,左丁山豈敢質疑佢嘅意見。
講起攝影,香港好多藏龍伏虎,沙龍攝影藝術名家輩出之外,新聞攝影亦巴閉。美軍轟炸喀布爾嘅第一個畫面,就係兩位以香港為基地嘅波蘭籍、美國籍攝影師為CNN拍嘅。九一一之後兩日,CNN已經叫咗佢哋去阿富汗,日等夜等,卒之等到全球第一個轟炸畫面,佢哋雖然唔係香港人,但亦係居於香港,有呢類人喺度,我哋先至可以話係國際城市。