【楚雲聲】第六場我有心水 一條鐵三角搞掂（Cloudy）
蘋果日報 2019/11/02 20:30
開心神駒Cloudy常感恩楚雲聲載譽歸來
載譽歸來上仗輕鬆大勝
周日（3日）又嚟到一年一度個個都爭住入場嘅「婦女銀袋日」，我chok咗張我自己揸住個銀色袋嘅相，一下就搭啱線，仲呃咗好多好多like。
青春少艾又好，成熟知性又好，成堆女士悉心打扮到花枝招展咁，儀態萬千，衣香鬢影。
嘩！就會有好男士出現，場面認真熱鬧，準備好高像素靚相機未？呢一日，靚可能真係大晒，好似話有獎頒。
而靚嘅馬就有呢幾隻。第六場二班1200米，「載譽歸來」輕鬆彈甩嚟贏，五歲仔持續進步，應該就無懼加咗好多磅，工夫照做，樣繼續靚，跟前好好跑，肯定個個買到佢變紅格。
「常感恩」開氣後更進一步，再操到火紅火綠，有氣又有力，我就唔敢飛啦！有檔有欄起碼唔會後。
「開心神駒」老當益壯，縱使上季3Win加勁多分，但佢都仲好神勇，上場熱身跑錯晒可以唔使理，試埋閘有機會做呢場神馬。就呢三隻買鐵角，為我個銀袋換金袋踏出第一步。