民陣今日發起反「送中」惡法遊行，香港天主教正義和平委員會在遊行前舉行祈禱會，逾70人出席，包括天主教香港教區榮休主教陳日君樞機，他向教友致辭時寄語教友不要小覷每一個人的力量微小。壹傳媒創辦人黎智英及資深大律師、民主黨創黨主席李柱銘亦有參與遊行。

李柱銘接受《蘋果》訪問時指，很開心見到今日很多港人參加遊行，坦言超出他的預期，因為他擔心很多香港人仍不明白《逃犯條例》對香港的影響，以為自己不是逃犯就不用理會，但其實今次問題並不如此簡單，修例一旦通過，共產黨日後想在香港捉任何一個人，都可以將該人士引渡至大陸，「因為大陸係可以隨時作口供，求其話你犯毒或者強姦咁就得，只要一個證人嘅口供紙喺內地，交嚟香港法庭，咁法官唔可能唔遣返嘅，因為（符合）表面證據，係好容易嘅啫」。

李柱銘又指港人一旦被引渡至大陸，將很易就被內地公安迫令認罪，之後就判刑，「所以我由始至終都話，呢條法例其實係仲毒過23條，因為23條立咗法，仲係喺香港審，大家對香港法庭仲有信心，但入咗內地，你點有信心呢？」對於林鄭至今拒絕撤回修例，李柱銘認為，「呢個就要香港人企出嚟，畀啲人數佢睇」，指多個國家都關注修例，擔心公民來港隨時被檢控和引渡，「所以香港人唔緊張係好傻嘅，我哋為自己、為自己前途，一定要用我哋嘅和平方法出嚟遊行，今次之後都一定仲有遊行搞嘅，咁我哋一定要顯示香港巿民對呢個條例嘅反對程度，等其他國際社會都睇到」。

由於民主派在立法會議席只屬少數，李柱銘指在建制派濫用多數權力下，民主派現時能做的不多，「所以更加要巿民行出嚟，巿民唔出嚟呢，立法會啲議員好勤力都無用，做唔到嘢」，指香港最重要是靠香港人守住，希望再次發揮03年50萬人上街拉倒23條惡法和令特首下台的威力，「所以一定要多啲人行出嚟，希望林鄭下台」。

黎智英受訪時則指，香港巿民越來越醒覺特區政府「越來越惡毒、越來越唔講理」，指如果不是香港人團結一致站出來，「香港就好快玩完，香港會變成大陸，唔只拉咗我哋，拉咗我哋之後，香港整個社會所有人都會好驚，任大陸點樣做、任佢擺佈，咁香港就無㗎嘞，遲早變成大陸」。他又批評今次的惡法是將香港一國兩制、司法制度完全毀滅，「如果我哋仲唔醒覺，到時就太遲，無論你哋係藍絲好、黃絲好，你哋都要出嚟，為咗我哋香港、為咗我哋將來、為咗我哋啲細路仔，我哋要勇敢行出嚟，人多勢眾，我哋就會有力量，我哋就會擋到呢個惡法，我哋先至保護到香港」。對於林鄭拒撤修例，黎智英認為「我覺得我哋要更多人出嚟，多到真真正正佢要撤回為止」。

陳日君表示，今日出席遊行的其中一個原因，是「三子叫我哋代佢哋行」；他稱今天遊行人數非常多，令他很感動，相信身在獄中的戴耀廷、陳健民也會很開心，「佢哋喺裡面唔怕，好好。」他又認為，修例的話影響力將較23條更甚，「23條喺呢度（香港）判、呢條（修訂逃犯條例）喺內地判！」

天主教正義和平委員會指出，當初銅鑼灣書店5子事件已突顯了中港兩地的法律制度不同，香港人爭取民主逾30年，但特區政府與中央失信予港人，並以人大釋法剝奪港人權利。他們為患病的陳淑莊、身陷囹圄的佔中二子、邵家臻、黃浩銘及不公義的社會制度祈禱，並憂慮逃犯條例使中國不公義的法律伸延香港，使港人人身自由受威脅。他們祈求上主賜市民堅強的心志，敢於在紛亂的社會中說真話，向不義的法律說不。

日期：4月28日（星期日）
集合地點：銅鑼灣東角道（下午3時集合）
起步時間：下午4時
遊行路線：銅鑼灣東角道至立法會
資料來源：民陣

-----------------------------
追蹤真相 守護公義
按此免費訂閱支持蘋果 無阻盡覽
https://hk.adai.ly/MtYhca7WTV
---------------------------
星期一至五晚上10點半
《動腦Q》Let's Q the money！
http://bit.ly/2QW8LcI