【每件都過百萬】願貼錢拍《星戰》 方力申:任攞一件雕塑走
方力申星戰
身為星戰迷嘅小方,見到咁多一比一嘅角色,佢就話自己都好想買返個。
方力申今日喺觀塘apm出席《星球大戰:最後絕地武士》電影主題展覽記者會,身為星戰迷嘅小方,見到咁多一比一嘅角色,佢就話自己都好想買返個,佢話:「細個嗰啲都有儲,但係一比一就冇,知道古天樂有好多收藏,有機會都想去參觀吓。我一比一嘅武士藝術品收藏就有7、8個,每個都500公斤以上,每次搬都要10幾個人,全部放喺倉,我同嗲啲屋企個倉都超過5000呎,都係租嘅,唔得呀!興趣太多,資金有限。」
記者笑指小方係「億萬富翁」,佢話:「太睇得起我嘞,錢唔係好重要,雖然冇錢唔得,最緊要係身體健康,心中富有,我心中嘅錢,何只一億呢?我唔係講風涼話,我都恨事業上有突破,有人話荷李活出鏡幾秒不如唔好去,我就唔係咁睇,如果畀我有機會喺《Star Wars》行過,跟住『焦』一吓就死,或者做死屍都肯㗎,貼埋錢我都肯,畀錢行紅地毯都大把人啦,不得了!」問佢可以貼幾多錢?小方就話任對方攞一件雕塑走,佢仲話每件雕塑都過百萬㗎!小方仲提到甄子丹能夠參與拍攝《星戰》,係香港人同中國人嘅光榮,以佢為傲。
更多娛聞,喺晒《娛果》
http://fb.com/appledailyent