憑62年電影《蘇小小》成名、主演過無數劇集的74歲資深演員白茵，早年退休後與前足球名將老公黃文偉享受人生。昨日是白茵姐與老公結婚50周年紀念，夫婦二人特於前晚在跑馬地馬會筵開16席慶祝，白茵姐契女蘇玉華、黃日華與太太梁潔華、胡楓、羅蘭、張兆輝夫婦、順嫂梁葆貞等均有到賀。
席間白茵大談婚姻之道說：「要互讓互諒，有乜嘢都要拎出嚟傾，有事好似粉筆字咁抹咗佢，鬧完唔好放隔夜，拗完就算。」可打算復出拍劇？她說：「冇拍三年，睇人做戲仲好，如果要捱就唔好喇，因為我好懶。」
對於契媽金婚，蘇玉華感嘆說：「聽到都暈一暈，好不可思議，戥佢哋高興，係夫妻典範。」蘇玉華指男友潘燦良早已求婚，但自己懶簽紙，亦不急於生B和要名份。

劉培基探嘉玲

至於謝賢初戀女友、現年82歲的粵語片年代紅星嘉玲，息影後嫁給泰國華僑姚武麟亦超過50年。劉培基昨日凌晨在微博上載他與嘉玲姐合照，大讚嘉玲姐優雅說：「最喜歡在她家和她兒孫一起飯敍，這也是我常掛念泰國的原因。今晚回看她結婚50年晚宴照片及正在戀愛的照片，時間太快。」記者昨致電劉培基，問到嘉玲姐近況時，他說：「好，非常之好，多謝關心。」
採訪：王連連、皓騫　
攝影：仇志德