莊思明與楊明在2016年因合作拍《愛‧回家》而撻着，雖然莊思明的父親莊寶是大馬拿督，又有逾8億身家，與楊明身份懸殊，不過並未有影響他們關係，兩人拍拖3年，經常拍拖放閃，甚至屢傳婚訊，楊明亦坦言與女友有共識，計劃3年內結婚。

未知是否因有報道指楊明進駐女友在山頂的豪宅，於是有不少網民留言批評，結果莊思明今日在IG貼長文，為楊明反擊：「有好多說話我想講好耐，好多人都會覺得我係無憂無慮，但其實又有幾多人真係知道我嘅為人同我嘅生活？如果我同大家講，其實我唔係大家眼中嘅攤大手板就有錢攞，我都要靠自己賺錢，有幾多人會信我？就算我同大家講我都會手停口停又有幾多人會在乎？我知道自己係比較幸運，因為我可以有地方住所以我好感恩，但我都要努力工作賺錢去支持我平時嘅起居飲食同生活同減輕家人嘅負擔，我唔係大家口中個啲唔使做都唔使憂嘅人。坦白講，我都想自己係！不過大家可以繼續誤會我，我冇所謂，因為入行第一日啲人都係咁睇我！」

言談間，莊思明直言最介意有人說楊明食軟飯：「我已經忍咗好耐冇出聲，我以為用時間可以證明一切，但原來好多人都唔會去睇事實。我可以好肯定咁話比大家聽楊明冇用過我一分一毫，反而調返轉，我買衫褲鞋襪甚至連去超級市場買屋企日用品嘅所有錢都係楊明俾，因為佢同我講照顧另一半係男人嘅責任。」她還說：「我今日忍唔住要出聲，係因為我唔想大家再去抹黑一個好努力去賺錢，去令家人同另一半過安樂日子嘅好人。佢為我付出嘅努力比大家想像中多，希望以後唔好再有人亂去作一啲猜測，因為咁樣對我同佢都唔公平。我哋兩個都好努力去為自己嘅事業打拼，無論成功與否我哋都付出過好多淚水同汗水。」

莊思明表示不明白為何總有人扮作很了解她們的生活，事到如今實在不想再忍，希望可以還他一個清白，她還說：「希望大家以後唔好再冤枉佢，睇住佢因為我而要受三年委屈我好心痛！認識我哋嘅人會知道其實我哋好似大家一樣每日好拼搏咁去為將來打算！壞男人我遇過，要我食餐飯都AA制嘅男人我都遇過，但楊明絕對唔係！所以如果以後再有人把口忍唔住想話佢食軟飯不如話我靠男人，因為呢個係事實，佢的確係有照顧我！」

最後莊思明說：「希望從今以後大家唔好再抹殺佢嘅努力同付出！多謝大家！祝願各位開心快樂過每一天！#每個人都在努力的活著 #希望大家能開心#好似幅相入面個BB咁開心#好鐘意呢張相#只有BB先係無憂無慮#但願我可以沒成長#咁我就可以好似BB咁乜都唔使諗」

-----------------------------
7月4日起 《蘋果動新聞》只限升級壹會員閱覽
繼續撐蘋果！