這晚（27日）谷草賽果「潘潘」聲，當大潘潘頓跑完第六場中三元後，小潘潘明輝連隨接力於第七場三班一哩，勝出姚本輝馬房「平天下」，此駒季內第二次出賽，以落飛熱門身份獲勝，單Win及組合獨贏A2分別派52及21元。

訓練「平天下」的姚本輝今早於日本睇完鎮倉寶綠魔「有得威」由巫斯義出操，備戰周日（10月1日）短途馬錦標後，本計劃趕返香港進入快活谷督師，但最終佢冇於「平天下」勝出後現身拉頭馬，不見其蹤影。

講番「平天下」，上仗季內初出1400米，配黃皓楠有前冇後末段力歇落第，今仗再戰換潘明輝，改爭谷草一哩，不再放頭，沿途守第三位，結果末段猶有餘勁，以頸位之先衝贏對手掄元。

「火車潘」潘明輝今晚刑滿復出，頭四場都獲亞軍及季軍，第七場更贏「平天下」，成功在復出之日贏馬補數。

第七場二至四名分別是「奇真」、「勢必跑」及「蓮花巨星」，四重彩派7,206元。

令人失望是雷神莫雷拉，本港前外援球星迪天奴入場，為今場馬主貝鈞奇名下、雷神操刀之「雷公鑿」打氣，結果雷神幾乎全程大外疊蝕位嘥力下，3.3倍大熱的「雷公鑿」只得第五名。