聽日係一年一度嘅年宵開幕，專門自家炮製諷刺時弊年宵產品嘅民主黨，今年再創新猷，整咗盒「超然鬥獸棋」，隻隻棋大大粒好揸手，主角有CY狼、夢熊、獅吼元秋、猿國強、驢寵物、熱狗、鼠王芬、蟻民，隻隻珍禽異獸均可食蟻民，蟻民只可食CY狼，一食就無敵，之後食乜都得。

原裝鬥獸棋有條小河，但民主黨變咗做「鉛水」，只有蟻民可以入河確保年年益壽，獅吼元秋可以因為老公係中國建築非執董，所以可以跳河到對面岸，無規無矩。

有份設計呢副鬥獸棋嘅民主黨創意媒體部部長黎敬瑋話，限量500副，每幅88蚊，明天維園18號攤位供蟻民搶購，返屋企諗計食咗CY狼。該黨年年都免費贈送接紙模型比市民接嚟過吓癮，今年就送「足金金猴」，附送咗一系列小型揮春畀市民配搭。