希慎廣場2012年開幕時，市場對其表現大多看淡，皆因當時正值自由行最高𥧌時期，零售業都集中火力賺這筆「容易錢」；希慎廣場沒有周大福（1929），沒有莎莎（178），一線名牌亦唔算多（主要為避開與同系利園直接競爭），單靠蘋果和誠品call客，是否能挑戰當時如日中天的時代廣場和崇光百貨？
然而，3年後的今日，風水輪流轉。周末到銅鑼灣逛一圈，希慎廣場人流尚算暢旺，但時代廣場人卻少得可憐。事實上，希慎廣場如扣除蘋果分店的貢獻，上半年銷售輕微下跌，崇光亦減1.4%，兩者表現均和大市同步。只有時代廣場，上半年生意急插9.6%，首9個月進一步惡化至跌12.9%。這一輪輸家誰屬，顯而易見。

其他營運者是否有先見之明，海迪唔敢講，但時代廣場「睇錯市」卻是相當明顯。該商場剛好在自由行累升近10年、這cycle見頂之時，豪擲5億元大搞翻新，把書店趕走，戲院踢去樓上，低層位置改成Tiffany、LV和Chanel，全線升級賣名牌。九倉（004）2013年曾表示，希望時代廣場3年內可收回翻新的成本。如商場堅持唔減租，達標唔難，但生意持續下滑，長遠又如何向月月交貴租的名店交代？
有市場消息指，銅鑼灣某大商場近日以減租近50%、但要簽約10年的條件，來挽留一名租戶。這反映了甚麼？一、生意真係好唔掂；二、該商場睇今次零售市道回落，過程會相當漫長，漫長到即使減租一半，10年後計仍然會「贏」。

海迪