陳瀅同黃心穎噚晚喺元朗出席《煙花，應該和誰看》首映禮，佢哋着上日式浴衣現身，好有氣氛。陳瀅就話通常會喺外地睇煙花盛會，但就同一班朋友一齊，問佢有冇試過好浪漫咁睇煙花嘅經驗？佢就爆話：「試過一次同個男仔去迪士尼，因為怕畀人影到，係偷偷哋去嘅，有輕微刺激感，不過o依家同嗰個男仔已經冇聯絡，好似曇花一現。」

講到老死何雁詩喺facebook發文，講起噚晚睇Ariana Grande前接受大台主播訪問完嬲嬲豬嘅經過，話說位大台主播居然認錯陳瀅係另一個人有咗BB嘅藝人吳若希，仲喺咪前問佢同「BB」嘅生活點滴，陳瀅就咁答：「知佢(何雁詩)比我更憤怒，可能佢錫我，唔應該畀人話我有BB。我當時都以為自己聽錯，耳聾到咁？不過我覺得對方係新人，唔會怪佢。」

另外，心穎就話期待喺香港同愛錫佢嘅人一齊一次睇煙花。提到之前森美唔小心放咗心穎拉低咗件衫嘅合照上互聯網，搞到佢好嬲，森美要即刻喺專欄道歉，佢話：「因為件衫郁咗位，嗰時叫大家千祈唔好send出去，但突然見到有報道寫，一見到係嬲嘅，森美大哥即刻話自己唔小心，佢都好唔開心同好內疚，反而我見到佢咁唔開心，已經平伏咗，仲登報道歉，我感動到眼濕濕，好開心有個咁關心我嘅朋友，今次因禍得福，有好嘅ending。」心穎仲爆男友馬國明唔知發生咗呢件事，當心穎報告完，馬明仲話係好小事。