港大牙醫學院為慶祝獲選為全球第2嘅牙科醫學學府,今晚喺北角一間酒店搞咗個酒會，八方當然趁機去湊熱鬧。酒會現場有唔少港大重要人物，包括校長馬斐森同佢太太Christina，仲有校委會主席梁智鴻。馬斐森上台致辭時話，唔少人都讚佢一生人做咗個最明智嘅決定，就係娶咗個做牙醫嘅老婆返屋企。

至於梁智鴻，致辭時就話好欣賞今晚酒會主題係「smile」，提醒佢就算近來香港有咁多煩惱，都要記得笑一笑。八方之後問梁醫生，係咪煩緊選副校長嘅事？佢就聲稱近來香港有好多事，例如噚日反水貨客事件，一樣令人苦惱喎!

講返主題，牙醫學院搞嘅酒會當然唔少得一班知名畢業生，連轉行做歌手嘅許廷鏗都有現身，成為全晚最多人爭住合照嘅嘉賓。